Presentación "As crebas da memoria"

No día de hoxe, recibimos a visita de Olga Rodríguez, compañeira e mestra no Milladoiro desde a súa apertura, a cal adicou os seus primeiros anos de xubilación á obra que nos presentou e nos regalou a familias e profesorado: "As crebas da memoria".

O libro ou artefacto, termo que ela escolleu, recolle 36 narracións de tradición oral, índices temáticos, xeográficos e códigos QR para seguir as rutas. Un agasallo en estreita relación co PDI NÓS  que pechamos o pasado curso, o patrimonio inmaterial.

O alumnado do 3º ciclo de primaria puido descubrilo un pouco máis polo miúdo, grazas á exposición e lectura de Olga, ademais da sinatura de exemplares.

Agradecid@s polo agasallo e a seguir valorando, conservando e transmitindo o noso patrimonio tal e como fixo Olga.

Cancioneiro de Buño: presentación na sede da RAG

Cancioneiro de Buño, un dos exemplares doado polo Concello de Malpica a nosa Biblioteca, foi presentado, no día de onte, na sede da Real Academia Galega.

A esta presentación asistiu o noso alumnado de 5º e 6º de Primaria acompañados polos seus titores. Na presentación deron boa conta das coplas recollidas no libro que aúna dous mundos creativos: a olería e a literatura popular. Premendo na seguinte imaxe accederedes ao álbum de fotos da xornada.

Voltaron da presentación co noso exemplar asinado polo editor literario, o cal recolle na dedicatoria a importancia de valorar e salvagardar o noso rico pasado.

Agradecemos a doazón dos exemplares por parte da Concellería de Educación, Cultura, Patrimonio e Deportes do noso Concello, así como a saída complementaria do noso alumnado para asistir á presentación na sede da RAG.

Educando en comunidade!