Biblio-Retos: RETARTE!

Premer na imaxe para acceder á galería de fotos

Ao longo do 1º trimestre os biblio-retos do mural RETARTE! tiveron moi boa acollida.

A arquitectura, a pintura e a música foron as tres artes protagonistas. O alumnado, de maneira voluntaria, ocupou os seus recreos en superar os retos mediante os cadernos-informe que debían depositar na urna correspondente para ser valorados e recibir o premio final. Todos/as superaron os retos sen dificultade.

O cine, a escultura, a danza e a literatura serán as artes que dean continuidade a esta actividade nos próximos trimestres. Actividade relacionada co PDI que nos ocupa e dinamizada polo equipo de Biblioteca-Dinamización da Lingua, co obxectivo de desenvolver a alfabetización múltiple e o acceso á información mediante os recursos da biblioteca.

A túa biblioteca busca... retARTE!

Plan Anual de Biblioteca-Leolab 2025-26

 

Premer na imaxe para acceder ao documento

Presentamos o Plan Anual de Biblioteca-Leolab (PAB) para o curso que iniciamos. Un plan que muda de nome (ata o presente curso Plan Lector Anual), mais segue reflectindo a esencia do que somos e facemos no CEIP Milladoiro, coa súa Biblioteca-Leolab como recurso imprescindible ao servizo do currículo e da comunidade.

O PAB completa o trío documental da Biblioteca-Leolab xunto co Plan de Lectura, Escritura e Acceso á información (PLEA) e o Plan de Biblioteca-Leolab (PB), aos cales podedes acceder desde o apartado Documentos da columna dereita do presente blog.

O PAB, que será integrado nas Programación Didácticas de Aula, acolle obxectivos, actividades, organización espazo-temporal e itinerarios lectores, entre outros apartados. Itinerarios que se reforzan cos títulos do Plan Lector 2025-26.

Premer na imaxe para acceder ao documento

Ao tempo, iniciamos unha nova aventura competencial co PDI "Marabillarte", incluído no PAB, na procura de máis lectura, información e aprendizaxe arredor dun centro de interese que nos une: as 7 artes.

Leo anímate a... MARABILLARTE! 

Novo curso... novos retos, novas aventuras!

Plan Lector Anual 2024-25

 

Premer na imaxe para acceder ao documento

Iniciamos nova singradura, curso 2024-25, dando continuidade ao Proxecto Documental Integrado "Medicus curat natura sanat" e as actividades de biblioteca que serán integradas nas Programacións Didácticas de aula mediante o Plan Lector Anual.

Un plan que dá continuidade ao que somos e facemos no CEIP Milladoiro: lectura, información e aprendizaxe. Ao tempo, inclúe os diversos itinerarios lectores para ir incrementando a biblioteca propia e persoal do alumnado de educación primaria e que podedes ver premendo na seguinte imaxe:

A nosa BE-LeoLab favorece e facilita metodoloxías activas nas que o alumnado é protagonista das súas aprendizaxes, e só mediante a responsabilidade individual e as accións colectivas (familias, profesorado, comunidade...) podemos ofrecer unha educación de calidade, acorde ao tempo no que vivimos: unha escola bibliotecaria con corazón, un cole que facilita aprendizaxes de vida e para a vida.

Viñeta de Xosé Tomás en www.nosdiario.gal

Bo inicio de curso a tod@s!