biblioteca.milladoiro.malpica

Stop motion

2012-05-24T12:55:00.002+02:00

O noso blog amigo Xogosdelingua na súa publicación de hoxe, suxíreme a idea de achegarvos a esta técnica coa que nos andivemos a partir a cabeciña nos últimos días. Trátase da stop motion, a vella técnica de animación para crear debuxos animados e que hoxe, coa axuda da tecnoloxía resulta algo máis doada. Calquera conto se pode trasladar a historia animada ¡E mira que non se escriben contos nas escolas! O video do IES As Barxas de Moaña explica ben a técnica. Hai moitos programas que se poden usar: MonkeyJam, Stop Motion Pro 6.5, Sony Vegas 10 Pro ... Deixovos outro titorial para facer prácticas.

Encontros de Bibliotecas Escolares de Galicia

2012-05-23T15:22:00.000+02:00

Video resumo dos Encontros de Bibliotecas Escolares de Galicia aos que o noso centro foi convidado e nos que presentamos unha ponencia que reflexiona sobre cal é o rol da tecnoloxía nas aulas. Xa non falamos de tecnoloxía da información, falmos de tecnoloxía ao servizo da aprendizaxe.

Festival das Letras na honra de Rosalía

2012-05-22T20:20:00.000+02:00

E, o venres 18: FESTIVAL DAS LETRAS As circunstancias propias deste curso, fixeron que, desde Febreiro viñeramos aplazando o festival de Homenaxe a rosalía. E, por fin, foi. O venres, finalmente, foi o día. A profesora de Música aprendéravos o himno, e nas aulas poemas de Rosalía que daba xenio escoitar. Logo, démoslles a volta á biblioteca (mirando para o lado contrario) para poder disfrutar da presentación que fixeran os de 6º sobre a figura de Paz Andrade. E, por último, cantamos o himno xuntos. Unha fermosa xornada. Estas son as imaxes.

Contos na semana das Letras

2012-05-22T20:10:00.000+02:00

Os de segundo: Os de 3º: Os de 5º: e os de 6º: Todos e todas escribiron historias (agora que xa aprenderon cales son os ingredientes básicos dun conto)e contáronas na biblio na hora de ler durante os tres primeiros dís da pasada semana. Grazas a todos por tanto traballo!

Sobre Paz Andrade: videos

2012-05-15T19:59:00.004+02:00

Para ratiños que vaiamos tendo nestes días, estes videos que nos achegarán máis á figura de Paz Andrade vista desde os ollos de outras persoas, incluído o seu fillo Alfonso que, como xa sabedes, leva ese nome na honra de Castelao. Gústame especialmente o primeiro dos videos que ilustra un poema que non deixa de estremecerme..."Cando ti volvas polo mare"... son palabras que teñen moito sentido cando esa é a túa historia, a túa biografía: a de milleiros de esposas e fillos de mariñeiros galegos entre os que me encontro.
Importantísima a reflexión de Alfonso Paz-Andrade sobre a importancia da empresa galega: sen empresa propia, con selo propio, con intereses propios, dificilmente se constrúe un país. Esa é a principal aportación deste home: pensaba en País e pensaba en empresa, visión que compartía con Isaac Díaz Pardo e outros bos e xenerosos.

Xogar e aprender desde Teis

2012-05-15T18:54:00.001+02:00

Desde o CEIP Frians de Teis (en Vigo) chégaonos este LIM sobre Paz Andrade. Agora que xa sabemos tanto sobre este home tan xeneroso, seguro que o podemos facer nun brinquiño ¿ou non?
Proba premendo sobre a imaxe.

Paz Andrade desde Ponte do Porto

2012-05-14T12:58:00.002+02:00

Valentín Paz Andrade- Letras Galegas 2012

View more presentations or Upload your own.

Esta vez trátase dunha presentación feita no IES Pedra da Aguia.Outra maneira de achegarnos á vida de Paz Andrade.

Máis Paz Andrade

2012-05-13T12:44:00.000+02:00

No CEIP Saco e Arce de Toén, elaboraron este mural dixital para achegarnos a figura de Paz Andrade. A celebración das Letras é sempre un motivo para coñecer un pouco mellor a figura a quen se lle dedica. Así que, adiante no achegamento a Paz Andrade!

Animais raros, raros

2012-05-11T16:12:00.002+02:00

Animais raros, raros

Publish at Calaméo or browse others.

O último traballo documental dos nenos e nenas de 5ºA trata sobre animais. Unha pequena investigación sobre o animal que escolleu cada quen de entre aqueles dos que nunca escoitara falar. Empregaron unha linguaxe moi científica ¡Abofé!

Ciencia e tecnoloxía

2012-05-04T12:08:00.000+02:00

Hoxe inaugúrase na Coruña o MUNCYT (Museo Nacional de Ciencia y Tecnología) despois de sucesivos aplazamentos na data.
Trátase dun novo museo construido pola deputación provincial e cedido para o seu uso á rede de museos do Ministerio de Educación e Ciencia.
Está no barrio de Labañou e son cinco mil metros cadrados para albergar unha colección que non está ben definida pois serán pezas itinerantes.
Conta cun robot, Pepexán, que é o encargado de guiar as visitas, entre outras cousas. A este personaxe vanlle facer unha compañeira que se vai chamar Marilú , no máis puro estilo da historia de Eva e Adán.
Pepexán conta xa co seu propio blog e perfil nalgunhas redes sociais.
Esperemos que aprenda idomas porque, de momento, tanto o seu blogue como a páxina do museo só se atopan nunha lingua: o castelán.
E, digo eu, que se pagamos o edificio e está na Coruña... debería falar coma nós ¿ou non? Ademáis, chamándose con nome tan do país, seguro que naceu por aquí, así que.... debería aprender, porque a ciencia tamén se pode explicar en galego
Esperamos do museo que serva, de verdade coma motor da curiosidade e a aprendizaxe.

Isto ven de vello

2012-05-02T15:36:00.001+02:00

Hoxe. o diario máis lido en Malpica, recolle esta imaxe na sección Tal como eramos.
Trátase dunha fotografía feita hai 20 anos na biblioteca do noso cole, con motivo dalgunha exposición ou campaña de lectura (non me pidades tanto da memoria porque.... ¡non o lembro exactamente!)
Recoñezo, no fondo da imaxe a Olga e a Ludi. Creo, tamén recoñecer a algúns alumnos pero... esperamos a que se identifiquen eles para non meter a pata JA, JA, JA!!!!
O bo do asunto é comprobar como a biblio, o traballo con ela e desde ela, sempre foi IMPORTANTE no noso colexio.
Velaí a proba.
P.D.- Enviamos un bico para todos eses da foto que hoxe son cidadáns adultos pero...¡antes foron así!

Letras 2012

2012-04-30T11:56:00.000+02:00

Unha completísima recompilación de recursos elaborada polos colegas do CEIP Nosa Señora dos Xuvencos.
Algúns deses recursos témolos xa no blogue de NL ou neste mesmo. Agora...¡todos xuntiños para que sexa máis doado escoller!
Dámolas grazas aos compañeiros deste centro por tanto traballo e de tanta calidade.

Visitamos Compostela

2012-04-29T22:24:00.000+02:00

O pasado venres fómonos de excursión a Compostela: 3º, 4º, 5º e 6º.
Primeiro: Auditorio de Galicia, cun concerto que percorría a historia do rock desde Elvis Presley ate Justin Bieber.
Despois: Cidade da Cultura.
Comemos no Parque de Bonaval e volvemos para casa.
Unha xornada interesante, ¿a que si?
Premendo na imaxe accederás ó álbum.

Mercadillo de intercambio de libros

2012-04-26T17:29:00.000+02:00

Seguimos coas actividades do Mes das Letras e hoxe tocounos Mercadillo de Intercambio de libros.
Premendo sobre a imaxe pódense ver tódalas fotos.
A actividade é ben sinxela: durante estes días atrás os rapaces foron traendo da casa libros que xa non len. Nese momento recibían un vale (propuxémoslles un máximo de tres libros) por valor do número de libros que traían para cambiar.
Desde o martes os libros estaban expostos, previamente clasificados nunha mesa por cada ciclo, co fin de que os viran e foran escollendo.
Existía a posibilidade de que cando lle tocara a un escoller, o libro desexado...¡xa estivera nas mans de outro compañeiro ou compañeira! Como na vida mesma!
Foi a primeira vez que o organizamos e serviunos para decatarnos do mundo de valores que hai implicados nun feito tan aparentemente sinxelo como intercambiar.
Finalamente intercambiáronse 305 exemplares, o que non está nada mal.
Pasamos unha tarde intensa, sen dúbida, e non tedes máis que mirar esa cariña de contento para saber cal foi o sentimento xeral.
E, agora..... A LER!!!

Presenza na prensa

2012-04-26T12:40:00.000+02:00

O xornal dixital Que pasa na costa faise eco da nosa actividade no Día do libro.
Agradecemos moitísimo esa difusión desinteresada do que acontece nos centros educativos da comarca. E, máis concretamente no noso ¡claro!
Con algunha frecuencia recibimos as preguntas de pais e nais de a que se debe que o que facemos non teña presenza noutros diarios comarcais. E non temos resposta.
Cada vez que imos organizar algunha ACTIVIDADE enviamos nota delo ós xornais. Tamén a Que pasa na costa, coa conclusión de que só estes últimos adoitan mirar hacia Malpica. É canto podemos dicir.
E esta entrada é para AGRADECER esa mirada atenta no máis puro estilo do xornalismo caval: contar o que sucede.

Día do libro: Padriños lectores

2012-04-25T11:32:00.002+02:00

Velaí as imaxes desta actividade que celebramos xa por terceiro ano consecutivo para conmemorar o Día do Libro.Trátase dos Lectores padriños e consiste en adxudicarlle a cada nenos ou nena un padriño ou madriña maior e que será encargado de lerlle un conto no Día do Libro. A actividade comeza días antes coas presentacións e conversas que manteñen padriños e afillados sobre as lecturas que lles gustan... e remata como estades vendo. Está nos nosos plans seguir a celebrala en anos sucesivos. Veremos se somos capaces tendo en conta como se nos están poñendo as cousas. ÁlBUM DE FOTOS

Manifesto pola lectura no Día do Libro

2012-04-23T15:49:00.000+02:00

Coincidindo co Día do Libro 2012, existe unha iniciativa impulsada por Luis Arizaleta (especialista en lectura e desenvolvemento de iniciativas culturais): o ambiente de lectura na escola, e é ese o nome do manifesto que vos convido a ler.

Son doce puntos moi breves pero que, de telos realmente presentes, suporía un verdadeiro reformulación da experiencia lectora, persoal e cultural dos nosos rapaces e rapazas. Para iso dirixímonos a toda a ampla comunidade vinculada coa lectura: escritores, mediadores, contistas, narradores, pais e nais, editores, profesionais da educación...

Aínda que sempre oímos aquilo de “niso todos estamos de acordo” o certo é que no mundo vinculado ao libro e á lectura hai moita leria e adorno estéril, pero tamén temos que dicir que hai moita xente traballando, no noso país e máis alá del, para que as cousas non sexan así. Sabemos que hai unha corrente forte e consolidada de xente que traballa para que os pequenos, medianos e maiores vivan a lectura con pracer e sabemos que, ademais, conségueno. E non deixa de ser significativo que xunto a todas esas persoas, que irán en aumento, ou non, non tiveran dúbida en estampar a súa su firma xente como Francesco Tonucci, ou escritoras como Rosa Aneiros ou Fina Casalderrey, de entre un grupo de 108 profesionais relacionados coa lectura.

O dito, propóñovos a súa lectura:

Open publication - Free publishing - More biblioteca

Esta manifesto está a circuklar no día de hoxe por diversas Comunidades Autónomas españolas. P manifesto pode asinarse AQUÍ

O Ensino Público ... E RURAL

2012-04-18T10:05:00.000+02:00

Hoxe, na Facultade de Medicina de Compostela, recíbense como MÉDICAS 3 exalumnas do Milladoiro.
Si.
Líchedes ben: son 3.
Na mesma promoción. 3. As novas médicas, Abella, Doldán e Romay son nenas de Malpica que chegaron a este cole con tres aniños. Aquí aprenderon a ler, a escribir a estudar, a falar en público, a investigar... neste colexio público. O único que hay no pobo. Logo separáronse durante a ESO para volver coincidir no IES da Ponte. E despois veu a Facultade.
Esforzo, traballo, sacrificio, dedicación... Unhas familias por detrás que sempre as alentaron a seguir. E os medios que o ensino público puxo ao seu alcance foron os ingredientes desa fórmula de éxito. Énchenos de esperanza sentirnos parte dese éxito.
Con frecuencia os nosos exalumnos acadan éxitos académicos pero nunca nesta proporción: 3!!!Conservamos os seus primeiros traballos de investigación, algúns dos seus escritos (contos, poemas...) e desde esta modesta fiestra ao mundo queremos rendirlles homenaxe e avisar a quen corresponda que sucesos coma este só son posibles cando as oportunidades chegan a toda a poboación, cando o ensino é público e universal, cando podes acceder aos mesmos bens que calquera outro contribuínte vivas onde vivas e sexa cal sexa a profesión de teus pais.
Esta é a grandeza dos servizos públicos. Este é a verdadeira concreción da compensación de desigualdades de partida, da igualdade de oportunidades, conceptos estes que, con frecuencia, enchen as bocas pero que, tamén con frecuencia, son conculcados cando nos botamos nos brazos dos recortes.
Desde aquí, un emocionadísimo abrazo, quentiño e orgulloso a esas señoras médicas que, para nós, sempre serán: as nosas nenas.

Parece que fala de nós

2012-04-17T11:57:00.002+02:00

Envíanos unha amiga esta producción feita en Francia pero que...¡parece que fala de nós!
Nos últimos tempos tódalas novas que chegan ao centro e, á sociedade no seu conxunto, levan a mesma dirección: recortes, axustes, supresións... empobrecemento do ensino, baixada nos recursos, baixada nos medios...
Hoxe o día amaneceu igual: máis rapaces por aula, menos profesorado, menos recursos...
E non é certo aquelo de que as familias poden escoller. En Malpica non. O único ensino é o PÚBLICO.
Cando pensabamos que só podiamos camiñar cara adiante, cara á excelencia, á superación do fracaso escolar... resulta que a escola que se debuxa no futuro próximo é a anterior a 1980!
No que a nós respecta, sempre buscamos a excelencia no noso traballo, fomos adiantados en programas e didácticas, pelexamos por levar ás aulas a mellor e mási moderna das educacións posibles. E aí están os recoñecementos en forma de premios.
E queremos seguir a facelo así. Pero...¿poderemos?
A atención ao alumnado require bibliotecas, departamento de orientación, aulas de audición e Linguaxe, tempo para reunirnos, para pensar e programar proxectos... ¿Como o faremos?
Precisamos tódalas complicidades posibles.
especialmente importantes son eses recortes na escola rural: falamos da igualda de oportunidades. e ese factor de igualación só o pode aportar a escola: que ofrece aos fillos e fillas dos contribuíntes a mesma calidade educativa sexa cal sexa o lugar no que residan.
Hoxe o ministro dixo que os institutos só poderán ofrecer UNHA modalidade de Bacherelato. Unha ÜNICA. De maneira que ou se mandan os rapaces a estudar fóra (quen poida!) ou todos estudarán o mesmo. ¿Quedaremos sen científicos ou sen linguístas?
Un despropósito. Un desatino.
En educación AFORRAR non é un criterio. INVERTIR é o verbo axeitado.
A non ser que xa alguén decidirá por nós cal ten que ser OBLIGATORIAMENTE o futuro dos nosos nenos e nenas ¿é así?
Pois que se diga en voz alta.

Andrea López

2012-04-12T16:51:00.001+02:00

Hoxe quero recomendarvos este blog que acabo de coñecer. Trátase do espazo persoal dunha xove deseñadora gráfica e ilustradora: Andrea López.
Encontrei nel un espazo cheo de vida e imaxinación, de traballo serio e profesional, de ideas e creatividade. E traigoo ata esta bitácora porque me parece que todas esas cousas significan, nos tempos que corren, unha fiestra de esperanza.
Porque, a pesares de que a realidade nos mostra cada día a súa cara máis dura, desagradable, intimidatoria, paralizante... millóns de persoas como Andrea, fan cada día o seu traballo aportando esperanza e ilusión, sen desmaiar pensando que hai posibilidades, que o traballo, a constancia, a profesionalidade, o esforzo e o bo facer, teñen un inmenso valor e serán quen de facernos sair deste tempo sen horizontes aparentes.
A Andrea e a tódalas andreas que no mundo hai: grazas polo traballo ben feito.
E, a cantos leades isto, non esquezades dar unha volta polo seu blogue: saíredes coas pilas cargadas.
Seguro.
P.D.: a ilustración desta entrada é dela (claro!) e leva por título GASTRONOMÍA.

Valentín Paz Andrade. Actividades

2012-04-11T18:24:00.000+02:00

Xa están á nosa disposición os materiais e actividades que, coma cada curso, elabora o Seminario Galán co gallo do Día das Letras Galegas e o autor homenaxeado, este ano Valentín Paz Andrade.
Agradecemos este traballo polo que ten de profesional e magnífico e porque nos aforra moito esforzo.
Grazas.

Cincenta

2012-04-09T11:50:00.006+02:00

En 5ºA o conto escollido para traballar foi Cincenta, como sabedes.
Esto que estades a ver é, dalgunha maneira, a culminación do traballo dos últimos seis meses: lectura, reelaboración do texto, secuenciación, ilustración, adaptación de texto e imaxe, lectura en voz alta, dramatización, técnicas para gravación de voz.... a idea era facer unha versión do conto para kamishibai.
Estaba tamén entre os nosos obxectivos, divulgar a versión dos irmáns Grimm así como ofrecer en soporte electrónico versións dos contos clásicos na nosa lingua.
E, finalmente,este foi o resultado!

Quentar motores

2012-03-23T09:25:00.001+01:00

Vaise achegando o Mes das Letras, de feito xa temos preparado o noso calendario de actividades. Como sabedes, este ano a figura homenaxeada é Valentín Paz Andrade, un home interesantísimo e sobre cuxa figura imos ir abrindo boca con este xogo que nos prepararon os compañeiros do CEIP Condesa de Fenosa Barco de Valdeorras.
Se PREMES na IMAXE accederás ao xogo.

Taller de ilustración con Jacobo

2012-03-21T11:36:00.004+01:00

Onte visitounos Jacobo F. Serrano e foi, coma decote, UN ÉXITO!!!!
A obra de Jacobo encanta aos rapaces e os talleres con el sempre son unha fonte de aprender e disfrutar.
Agradecémoslle o seu esforzo desde esta fiestra e...¡lendo os seus libros.
Aí vos quedan as imaxes que, na miña opinión falan por si soas.

Charla sobre o oficio de redeira

2012-03-14T15:32:00.002+01:00

Hoxe recibimos a visita da Presidenta da Asociación de Redeiras O Fieital: Ángeles Millé, para poñer o remate á investigación sobre as redeiras que emprendimos con motivo do Día Internacional da Muller traballadora.
Os nenos e nenas de 5º A, con toda a información recollida, prepararon unha pequena exposición oral que apoiaron nas imaxes conseguidas nestes días e que, coma tel´n de fondo, acompañaron as súas explicacións.
Convocamos na biblioteca a tódolos cursos que non acudiran á actividade organizada polo Concello e... o resultado téndelo nas imaxes.
Nos vindeiros días, no blogue do 3º ciclo, irán publicando as súas aportacións.
Como dixo a Sra. Presidenta: esta actividade era necesaria porque explica, porque fai entender e porque dá visibilidade.
Nós quedamos satisfeitos.