Dereitos da Infancia 20N

Coa chegada de novembro, no colexio reservamos un espazo moi especial para lembrar o Día Internacional dos Dereitos da Infancia. Máis aló de ser unha data no calendario, é unha oportunidade para parar, pensar e dialogar en comunidade sobre o benestar dos máis pequenos.

Queremos lanzarvos polo tanto unha pregunta, tanto ás familias como ao alumnado:

Sabedes cales son exactamente estes dereitos? E, sobre todo... credes que se cumpren na actualidade?

Aínda que hoxe en día moitos nenos e nenas gozan de educación, protección, sanidade e un fogar seguro, a realidade amósanos que aínda queda moito camiño por percorrer no mundo para que todos os menores teñan as mesmas oportunidades e vivan libres de violencia, pobreza ou discriminación.

Para axudarnos a comprender mellor esta realidade e espertar o espírito crítico dende ben pequenos, preparamos unha selección de lecturas recomendadas (contos e libros adaptados a distintas idades) que aborda os dereitos fundamentais da infancia desde a empatía, a sensibilización e a literatura.

Convidámosvos a escoller algún destes títulos para ler na casa, conversar cos vosos fillos e fillas e descubrir xuntos historias que nos lembran a importancia de protexer, escoitar e coidar á infancia todos os días do ano.

Celebramos o noso tradicional Magosto no cole!

 O pasado xoves 5 de novembro, o noso colexio encheuse do aroma e da alegría propios do outono para celebrar unha das nosas festas máis agardadas: o Magosto.

Foi unha xornada moi especial na que a tradición e a diversión foron as grandes protagonistas. Para desfrutar ao máximo, organizamos un gran circuíto de xogos por estacións con temática de outono e castañas. 

Para poñerlle o broche de ouro a esta mañá tan completa, contamos coa imprescindible colaboración da nosa ANPA, que se encargou de asar unhas castañas quentiñas e deliciosas para todo o colexio.

Despois de tanto xogar e gozar das estacións, baixamos o ritmo e comemos as castañas nas nosas aulas, compartindo un momento moi acolledor e saboroso cos compañeiros e compañeiras de clase.

Queremos agradecerlle enormemente á ANPA a súa implicación e traballo para facer posible esta festa, así como a todo o alumnado e profesorado pola súa participación e entusiasmo.

Que viva o Magosto! 

Pd: están subidas as fotos á galería de coppermine.

Samaín!

Sabedes que a semana do Samaín é unha das que máis nos gustan no cole? Este ano, como non podía ser doutro xeito, fixemos unhas propostas moi artísticas.

 Por unha banda, o alumnado de Educación Infantil gozou dun taller de cabazas en colaboración coas familias, ás cales lles agradecemos moito que viñeran celebrar este día con nós. 

Por outra, o alumnado de Educación Primaria elaborou un xogo de pistas sobre diferentes artistas, iso si... estes personaxes estaban... ENCABAZADOS!

Chega a semana máis arrepiante do ano á nosa biblioteca!

Como xa é tradición cando se achega o Samaín, a nosa biblioteca escolar volve transformar os seus recunchos para acoller as Lecturas Terroríficas, unha das actividades máis agardadas de todo o curso.

Para celebrar esta data tan sinalada, preparamos un programa ben completo e variado que inclúe dende fascinantes representacións teatrais e teatro de títeres ata cancións arrepiantes e coreografías de baile que deixan a todo o mundo coa boca aberta.

É unha marabillosa oportunidade para que os nenos e nenas compartan momentos inesquecibles cos seus compañeiros e compañeiras, comprobando que a lectura e a arte poden camiñar da man e ser sumamente divertidas.

Benvidas e benvidos ao novo curso escolar!

Comeza un novo curso e Leo xa está preparada para volver navegar entre libros, historias e aventuras. 

Despois dun verán de descanso, a biblioteca escolar volverá abrir as súas portas para recibirvos e acompañarvos o 1 de outubro. Aquí atoparedes historias nas que mergullarse, personaxes que coñecer, lugares que descubrir e libros para todos os gustos.

A partir dese día xa poderedes:

• Levar libros en préstamo e escoller a vosa próxima lectura.
• Visitar a biblioteca nos recreos.
• Coñecer as novidades que vaian chegando aos andeis.
• Participar nas actividades e propostas que iremos preparando ao longo do curso.

Leo xa está contando os días para volver recibirvos. Seguro que ten preparada máis dunha aventura para compartir con vós!

Así que xa sabedes: o 1 de outubro, mergullámonos de novo no mundo dos libros!

Benvidos á biblioteca!
Benvidos a un novo curso cheo de historias!

Leo e a biblioteca escolar espéranvos! 

Graduacións e xogos en familia

Premer na imaxe para acceder á galería de fotos

Un curso máis no que despedimos ao alumnado de 6º de primaria, que iniciará nova travesía na educación secundaria o vindeiro curso, e damos a benvida á etapa de primaria ao alumnado de 6º de educación infantil.

Un emotivo acto ao que asistiron as familias do alumnado graduado para posteriormente gozar da merenda ofrecida pola ANPA e os xogos en familia.

Premer para acceder á galería de fotos

Feliz verán a tod@s!

Lectura e Familias: concerto de Pakolas

Premer na imaxe para acceder á galería de fotos

No día de hoxe, pechamos o programa Lectura e Familias 2025-26 co concerto de Paco Cerdeira, Pakolas, con As máis molonas!

Un concerto para toda a comunidade, celebrando o acto da lectura en múltiples formatos, entre eles contar e cantar.

Agradecid@s a Pakolas polo seu rock infantil que, narrado con música e humor, gustou a peques e maiores.

Convivencia intercentros 2025-26

 

Premer na imaxe para acceder á galería de fotos

Un curso máis, a xornada de convivencia intercentros organizada polo Concello de Malpica foi todo un éxito.

Diversidade de xogos e inchables no patio do noso colexio para compartir c@s nen@s de todos os centros do concello.

Agradecid@s ao Concello por unha xornada do máis lúdica para pechar o curso.

Xornada sobre rodas 2026

Premer na imaxe para acceder á galería de fotos

Un curso máis, desenvolvemos a Xornada sobre rodas. Unha actividade para vivenciar a educación vial: respectando os sinais verticais, o sentido da circulación e á autoridade, representada polo alumnado de 6º de primaria que facilitou a circulación e ata aplicou algunha sanción por velocidade.

Feliz verán... sobre rodas!

Día do Medio Ambiente 2026

 

Premer na imaxe para acceder á galería de fotos

Conmemoramos o Día Mundial do Medio Ambiente 2026, seguindo o PDI de centro, con diversas creacións artísticas feitas con materiais de refugallo, aplicando as 3R: reciclando, reducindo e reutilizando.

Seguimos querendo... concienciARTE!

II Maratón Teatral do Concello de Malpica

Premer na imaxe para acceder á galería de fotos

Continúa a programación cultural do Concello, Malpica nun mar de letras 2026, coa II Maratón Teatral. 

Teatro da man dos/as nenos/as inscritos/as no Obradoiro de Animación Teatral do Concello, que representaron dúas funcións para os centros educativos do concello, tal como se pode ver na seguinte imaxe da programación:

Premer para acceder á máis información

O venres 12 de xuño repetirán funcións, abertas a todo o público, no Centro Cívico e Cultural. Animádevos a gozar do teatro cos máis pequen@s!

Clausura Biblioteca-Leolab 2025-26

Premer na imaxe para acceder á galería de fotos

No día de hoxe, damos por pechado o curso 2025-26 no que á Biblioteca-Leolab se refire.

Un curso de merecidos diplomas e agasallos para os/as biblioaxudantes/as, voluntarios/as Hoxe le..., grupos-aula que máis puntos obtiveron reciclando todo o curso e os/as premiados/as nos diversos xogos dos recreos activos e inclusivos.

Parabéns a tod@s, a Biblioteca-Leolab voltará abrir o vindeiro curso con máis experiencias de lectura, información, aprendizaxe, solidariedade, inclusión e convivencia.

Feliz verán a tod@s!

Guía de verán 2026

Guía de verán 2026 de bemilladoiro

Presentamos a guía de verán 2026 que entregaremos á comunidade o último día lectivo do curso.

Unha guía que acolle lecturas e xogos para o tempo de lecer. Lecturas que atenden a diversos xéneros: narrativa, clásicos, banda deseñada, informativos...

Lecturas e xogos para este verán ou calquera día do ano.

Feliz verán lector a tod@s!

Club de lectura: "Leo le"

 O presente curso, 2025/26, entramos a formar parte do programa "Clubs de lectura" da Asesoría de Bibliotecas escolares de Galicia. Naceu co nome de "Leo le" co obxectivo de promover a lectura compartida en galego e despertar o interese en torno aos libros. Foi un comezo tímido no que soamente participaron tres alumnas de 6º de Educación Primaria na lectura do primeiro libro escollido, "Dúas bágoas por máquina" de Fina Casalderrey. Elas foron as que escolleron a seguinte lectura, "Meigas" de Esteban Folgar Brea, ampliando ademais a participación ao alumnado de 4º e 5º de E.P. coa adaptación de lectura fácil da Editorial Galaxia. Sempre animamos a reunión cun pequeno aperitivo que facía as nosas aportacións máis doces.

Esperamos que este club continúe nos vindeiros anos con moitos máis libros e lectores!

Lectura e Familias 2025-26

Un curso máis, e xa van catro, desenvolvemos o programa Lectura e Familias: educa-tribo.

Un programa que permite a lectura compartida coas familias e entre iguais, así como sesións formativas.

Achegamos listaxe das actividades que se inclúen no programa:

• Aniversarios lectores, que mellor regalo que unha lectura compartida coa familia.

• Hoxe le..., sesións de lecturas compartidas entre iguais.

• Educa-tribo, sesións formativas impartidas polas familias: lámpadas de lava, calceta, pintura e flores con lazos.
• Concerto de Pakolas, As máis molonas!, programado para pechar o curso escolar.

Agradecid@s a toda a comunidade pola súa colaboración e implicación na implementación do programa, que inclúe actividades xa sistematizadas na nosa biblioteca.

Felices lecturas!

CAMPIONATOS DE XOGOS DE MESA

CAMPIONATOS DE XOGOS DE MESA

   Un ano máis, algúns alumnos e alumnas do cole participan durante todo o curso nos campionatos de xogos de mesa, disputados nos recreos, onde se mesturan alumnado de toda a primaria en dúas categorías: 1º , 2º e 3º de primaria e por outra banda 4ºº,5º e 6º. Os nenos e nenas pásano pipa e descubren outras opcións para facer no seu tempo de lecer.

Podedes ver algunhas das nosas partidas pinchando na seguinte imaxe.

Teatro: A Gran Viaxe das Letras Galegas, até Begoña Caamaño

Premer na imaxe para acceder á galería de fotos

Celtia Figueiras, de A Xanela do Maxín, voltou a nosa biblioteca para representar A Gran Viaxe das Letras Galegas, até Begoña Caamaño.

Unha obra con participación da cativada que percorre diversas épocas e autorías galegas. Unha viaxe emocionante a través da lingua, da historia e da cultura galega.

Dicionario artístico

Presentamos o libro de produción propia que se deriva do PDI Marabillarte.

Un dicionario que acolle vocabulario relacionado coas sete artes e que pasará a formar parte do oco 4 da CDU da biblioteca, producións propias, despois de ser encadernado e catalogado.

A seguir marabillándose coas sete artes!

Malpica nun mar de letras: Chaves invisibles

 

No día de hoxe, o alumnado de primaria asistiu, no Centro Cívico e Cultural de Malpica, a unha actividade ofertada polo Concello dentro da súa programación Malpica nun mar de letras.

O espectáculo Chaves invisibles é unha homenaxe a Begoña Caamaño, que da man de Vero Rilo e Luís Iglesias convida e entrar no universo literario, mediante a música en directo, da homenaxeada polo Día das Letras Galegas 2026.

Agradecid@s ao Concello por achegarnos, un curso máis, cultura na nosa lingua.

Festival das Letras 2026

Premer na imaxe para acceder á galería de fotos

Un curso máis e como xa é tradición, celebramos o Festival das Letras 2026. Actuacións de todos os grupos-aula en relación co PDI que nos ocupa, Marabillarte, ou con Begoña Caamaño a quen se lle adica o Día das Letras Galegas.

Feliz Día das Letras Galegas, todos os días do ano!