Charla sobre o oficio de redeira

Hoxe recibimos a visita da Presidenta da Asociación de Redeiras O Fieital: Ángeles Millé, para poñer o remate á investigación sobre as redeiras que emprendimos con motivo do Día Internacional da Muller traballadora.
Os nenos e nenas de 5º A, con toda a información recollida, prepararon unha pequena exposición oral que apoiaron nas imaxes conseguidas nestes días e que, coma tel´n de fondo, acompañaron as súas explicacións.
Convocamos na biblioteca a tódolos cursos que non acudiran á actividade organizada polo Concello e... o resultado téndelo nas imaxes.
Nos vindeiros días, no blogue do 3º ciclo, irán publicando as súas aportacións.
Como dixo a Sra. Presidenta: esta actividade era necesaria porque explica, porque fai entender e porque dá visibilidade.
Nós quedamos satisfeitos.

Taller coas atadoras

Pola tarde, tivemos un taller no Centro Cívico coa Asociación Profesional de Atadoras O Peirao.
Nenos e nenas aprenderon moitas cousas estes días, xa as contarán eles nos informes que andan a facer pero, así, de entrada, o que todos aprendimos foi que un traballo que tradicionalmente se facía nas casas coma unha parte máis do traballo invisible das mulleres, hoxendía ten o recoñecemento dun labor profesional e como tal é remunerado e valorado.
As nosas atadoras, artesás e profundamente coñecedoras do seu oficio, viaxan a onde as chamen (e chámanas de moitos sitios!) tanto a facer como a reparar toda clase de aparellos.
Aprender é complexo e elas queixanse de que lles falta o relevo xeracional.
Veremos como se nos dá o futuro.
De momento, están asociadas (desde 2004), son as súas propias xefas, milloraron considerablemente as súas condicións laborais e deron a coñecer que ESO que fan é unha profesión MOI especializada.
Tamén para esto vale o Día Internacional da Muller traballadora.

Atadoras de Malpica

Os nenos e nenas de 5ºA estiveron a traballar sobre o tema das ATADORAS (que noutros sitios chámanse redeiras) e, entre outras cousas fixeron unhas entrevistas que podedes escoitar AQUÍ
Mañá, Día Internacional da Muller Traballadora, faremos unha actividade preparada polo Concello de Malpica sobre esta profesión que, en Malpica, é feminina.
Prometemos: máis entrevistas, fotos das atadoras e un informe do que aprendemos.