Criaturas. Revista de LIX

Esta fin de semana trouxonos unha excelente nova no terreo dos libros e a lectura: o nacemento da revista Criaturas. No editorial, os promotores din:

 "...Queremos que esta criatura inicie un vieiro que terme dos pasos das persoas que a escriben, a ilustran, as que a difunden, as que a estudan e, de xeito especial, as que a len e só esperan atopar en cada páxina unha emoción inesquecíbel. O único contrato pechado é o compromiso coa LIX en xeral e a galega en particular."

Para cantos participamos dun ou doutro xeito neste mundo é unha excelente noticia pois anque sabemos que contamos cunha das LIX máis fecundas do panorama mundial, cousa que atestiguan os reiterados premios que reciben as nosas editoriais e autores/as en cantos certames se celebran no mundo, non dispoñiamos dun espazo de reflexión e debate, dun escaparate conxunto.
Agardamos pois, para esta Criatura, unha longa vida que nos alimente a todos/as no noso labor cotiá.

 "A criatura xa naceu. Pronto abrirá a súa boca para se alimentar. E entón precisará de todas e todos nós. Contamos co entusiasmo das cousas que empezan e coa ilusión dunha viaxe da que descoñecemos o paradoiro. Pero ningunha aventura de verdade ten os mapas de todos os mundos."