Aquarium Finisterrae no CEIP Milladoiro

Premer na imaxe para acceder á galería de fotos

Pechamos o 2º trimestre coa visita do Aquarium Finisterrae ao noso cole. Tod@s visitamos a furgoneta do Aquarium na que Carlos e Jose nos ensinaron unha mostra da diversidade de vida mariña que tan ben coidan nas instalacións de A Coruña.

Todas as aulas marabilladas vendo, e mesmo tocando, melgachos, rodaballos, estrelas de mar, cangrexos, centolas, ourizos e ata un coral.

Un privilexio de visita que a tod@s gustou e, seguro, non olvidaremos. Agradecid@s ao Aquarium Finisterrae e na súa representación a Carlos e Jose, pola súa amabilidade e bo facer.

Un petisco do Aquarium que animamos ir visitar estes días de descanso, un plan do máis natural e divertido!

Terapia asistida con cans

Estes días recibimos a visita do equipo IncrescenTO, en colaboración coa Universidad da Coruña, para presentar a todo o alumnado do centro o traballo da terapia asistida con cans. Axudan a mellorar a calidade de vida de quen o precisan a través das actividades realizadas con estes animais e nestas sesións fixeron unha demostración sendo o alumnado parte activa e traballando o benestar emocional como eixe principal en todas as intervencións. Podedes ver todas as fotos premendo encima da imaxe:

Teatro: Pasando a bóla. Xogando para cambiar

 

Premer na imaxe para acceder á galería de fotos

O pasado curso inauguramos o Punto Laranxa do cole coa peza teatral de A Xanela do Maxín, "Pasando a bóla. Xogando para cambiar" para o alumnado de 2º e 3º ciclo de primaria.

No día de hoxe, volvemos contar con eles para representar a mesma peza ao alumnado de 1º, 2º e 3º de primaria dentro do programa da Consellería que solicitamos este curso.

A representación teatral foi dirixida por Celtia Figueiras, autora do libro que inspirou a peza "A Banda dos Insectos. Pasando a bóla".

A participación activa do alumnado, protagonizando diversas escenas e aportando solucións a todas as situacións que se viven no escenario, favorece o coñecemento e reflexión arredor do acoso escolar.

Todo un éxito de función, na procura da mellora do benestar persoal e social.

Día do Libro Infantil 2025

Premer na imaxe para acceder á galería de fotos

Ao longo do 2º trimestre a nosa exposición de novidades foi renovándose segundo iamos catalogando as novas adquisicións: títulos diversos para lectoras/es diversas/os.

Celebramos o Día do Libro Infantil 2025 coa exposición permanente Leo le... NOVIDADES!. Unha exposición viva e moi visitada para os empréstitos a domicilio ou para as aulas.

A variedade de libros adquiridos garda relación con intereses e gustos lectores diversos, na procura de ofertar a nosa comunidade lecturas de calidade contrastada e dinamizando a lingua galega.

Felices lecturas, hoxe e todos os días do ano!

Encontro con Berta Dávila

Premer na imaxe para acceder á galería de fotos

O alumnado de 1º e 6º de primaria mantiveron un encontro con Berta Dávila autora de O libro grande dos números pequenos e O Concurso dos Mellores Inventos (e outros incribles acontecementos)

Entre poesía e narrativa a escritora foi respondendo a todas as preguntas, que non foron poucas, arredor dos dous exemplares que forman parte dos títulos incluídos no Plan Lector 2024-25 do centro.

Ao tempo, asinou todos os exemplares de cada nen@ para que tanto os que iniciaron etapa de primaria como os que a rematan conten na súa biblioteca persoal cun libro de calidade en lingua galega e... asinado pola autora!

Agradecer a Xerais que nos facilitara o encontro e a Berta a súa dispoñibilidade e amabilidade para compartir o seu tempo c@s nen@s e profes do Milladoiro.

Coñecendo a... Photon Robot!

O alumnado de 1º, 2º e 3º de primaria, grazas ao orzamento do Programa Innova, coñeceu e experimentou con Photon Robot, un novo recurso da nosa biblio creativa.

Da man de Flor, de Maker Store by Allknow de Carballo, programaron a Photon Robot para chegar a diversas emocións que foron descubrindo mediante un relato contado.

Premer na imaxe para acceder á galería de fotos

Seguimos ampliando recursos e formación en programación e intelixencia artificial para mellorar o ser e o saber... facendo!

 

Semana da Muller 2025

Premer na imaxe para acceder á galería de fotos

Na nosa Semana da Muller 2025 realizamos un mural de centro, Elas... c@ntan!, para homenaxear a todas as mulleres que abriron camiño a moitas outras na conservación da nosa tradición oral e cultural. 

Todas as aulas realizaron as biografías de diversas mulleres bergantiñás relacionadas coa poesía popular oral e a música tradicional, poderosas ferramentas na mellora do noso benestar persoal e social:

• Pandereteiras de Mens de 1º e 2ºA de primaria

• Herdeiras das Pandereteiras de Mens de Educación Infantil

• Teresa dos Cucos de 2ºB-3º de primaria

• Mª Xosé Silvar, máis coñecida como Sés, de 4º de primaria

• Icía Varela de 5º de primaria

• Lupe Blanco de 6º de primaria.

Un trimestre no que contamos con visitas moi especiais, na biblioteca ou nas aulas, para informarnos, realizar entrevistas, contar, cantar... e así desenvolver as diversas biografías.

Parabéns a tod@s polos valiosos produtos finais e feliz Día da Muller, hoxe e todo os días do ano!

Encontro con Sabela Fernández

Premer na imaxe para acceder á galería de fotos

No día de hoxe, o alumnado de 5º de primaria asistiu ao Encontro con Sabela Fernández Trelles, autora de A miña avoa, a miña heroína.

O exemplar, que forma parte dos títulos do Plan Lector 2024-25, reflicte os medos de Laura e a tan necesaria rede de apoio na que a súa avoa é a súa heroína. Un relato altamente emotivo no que algunha das alumnas lectoras se viron reflectidas.

Sabela dinamizou o encontro con diversos materiais cos que foi dando tratamento aos puntos clave da súa aventura literaria, fantástica ou real foi unha das preguntas, a que a autora respondeu que algo de realidade persoal tamén había na historia.

Agradecemos a editorial Xerais a posibilidade de contar con Sabela Fernández, e a escritora por regalarnos un relato tan noso: as nosas raíces, as relacións familiares, o benestar emocional...

O encontro pechouse coa entrega dun pequeno agasallo para que recorde este primeiro encontro na biblioteca do noso cole, así como coa sinatura de libros da que recollemos a seguinte frase de Sabela:

Vive e soña sen medo!

Grazas Sabela, esperamos novas aventuras literarias para volver... encontrarnos, emocionarnos!

Charo Pita na Semana da Muller 2025

 

Premer na imaxe para acceder á galería de fotos

Conmemoramos a Semana da Muller 2025 coa visita de Charo Pita, que encantou a pequen@s e maiores de Educación Infantil, 1º, 2º e 3º de primaria.

A animación á lectura de Charo xirou ao redor de diversas Mulleres intrépidas e verdadeiras como Mary Kingsley, así como @s cativiñ@s do Milladoiro se recrearon cos seus monicreques e contos cantados.

Ao tempo, narrou un exemplar da súa autoría, Valentina Nunca Calas e o Monstro da Media cara, no que a valentía de Valentina fai minguar o Monstro da Media cara. 

Unha experiencia de narración oral do máis divertida!

Entroido 2025

 

Este ano festexamos "Un entroido do máis natural" co deseño de disfraces acorde ao PDI deste curso, "Medicus curat natura sanat". Deste xeito, os alumnos e alumnas foron de insectos, animais exóticos, flores, ovellas...Podedes ver todas as fotos da xornada premendo no seguinte enlace: Entroido 2025.

Día de Rosalía de Castro 2025

Como cada curso escolar, conmemoramos o Día de Rosalía de Castro seguindo o lema da Asociación de Escritoras e Escritores en Lingua Galega.

Destacamos a recolleita de poesía popular oral, grazas á colaboración das familias, que permitiu que cada aula gravara en Radio Balea diversas coplas, as cales tamén se recollen nas plantillas das pandeiretas que compoñen o mural adicado a Rosalía de Castro, "Saúde e Terra!".

Premer na imaxe para acceder á galería de fotos

Hoxe, e todos os días do ano...

SAÚDE E TERRA!

FELIZ DÍA DE ROSALÍA DE CASTRO!

Encontro con Lupe Blanco

Todas as aulas de primaria mantiveron un encontro con Lupe Blanco, grazas a cal se achegaron a poesía popular oral e crearon coplas para o noso entroido: un entroido... do máis natural!

Premer na imaxe para acceder á galería de fotos

Una xornada divertida e creativa, na cal cada aula, coa axuda de Lupe Blanco, foi creando unha copla adicada ao seu disfraz.

As coplas finais podedes escoitalas premendo no seguinte podcast, grazas a colaboración de: Candela, Clara, Dania, Noela e Marco G. (voces) e a mestra Susana (pandeireta):

Agradecemos a Lupe a súa dispoñibilidade e bo facer, nunha xornada na que a poesía popular oral foi a protagonista para achegar a comunidade as nosas tradicións e valorar a nosa lingua nai, nun día coma hoxe no que conmemoramos o Día da Lingua Materna.

Encontro con Icía e Xosé Manuel Varela

 

Premer na imaxe para acceder á galería de fotos

O alumnado de 5º e 6º de primaria mantivo un encontro cos autores de "Cantareiras", Icía e Xosé Manuel Varela.

Un libro no que fan un percorrido polo legado da música e a poesía popular: Pandereteiras de Mens, Eva Castiñeira e Adolfina e Rosa Casás; mulleres homenaxeadas o Día das Letras Galegas 2025.

Pecharon o encontro cantando e tocando, para celebrar a nosa rica tradición oral: patrimonio inmaterial que debemos conservar e preservar; así como realizando unha entrevista en Radio Balea, polo alumnado de 5º de primaria, que a continuación podedes escoitar:

Agradecemos a Icía e Xosé Manuel a súa dispoñibilidade para vir a presentarnos o seu libro, que xa forma parte do catálogo da nosa biblio, con dedicatoria incluída.

.

Día Mundial da Radio 2025

Hoxe conmemoramos o Día Mundial da Radio 2025 e, como cada ano, unímonos á proposta de Ponte nas... Ondas! e Rede Espora, grazas ao fantástico podcast creado polos biblioaxudantes de Radio na Biblio de 5º de primaria.

Premendo no seguinte enlace, poderedes ler a publicación realizada no blog do 3º ciclo e escoitar o seu previsor e imaxinativo podcast gravado en Radio Balea:

Millainforma: cambio climático

Parabéns polo fantástico traballo e feliz Día da Radio, hoxe e todos os días do ano!

 

Exposición 2º trimestre: conmemorando!

Premer na imaxe para acceder á galería de fotos

Os libros seguen acompañándonos no 2º trimestre para lembrar, conmemorar, ensinar, sensibilizar...

Exemplares que atenden a proposta de actividades do trimestre e facilitan o desenvolvemento das mesmas. 

Seguimos... necesitando libros para investigar, divertirnos, emocionarnos!

Continuamos... mans aos libros!

Retos pola Paz!

Retos pola Paz_2024-25 de bibliotecamilladoiro, presentación de E.I. a modo de exemplo.

Conmemorando o Día Escolar da Non Violencia e a Paz e seguindo a proposta de actividades do PDI de centro, cada aula desenvolveu os retos pola Paz, tal e como se recolle nos blogs de ciclo e aos que podedes acceder premendo en cada enlace:

• Educación Infantil: convivindo

• 1º de primaria: convivindo

• 2ºA de primaria: retos pola Paz... intercentros!

• 2ºB-3º de primaria: paraugas pola Paz

• 5º de primaria: pulseiras pola Paz

• 6º de primaria: bailando pola Paz

Retos cumpridos, parabéns!

Xornada de portas abertas 2025

Un curso máis, abrimos as portas do CEIP Milladoiro para recibir a nen@s e familias que queiran formar parte da nosa comunidade educativa o vindeiro curso 2025-26.

A visita para coñecer o centro e as súas instalacións está programada para o xoves 27 de febreiro ás 16:15 horas, sen necesidade de concertar cita previa.

Na imaxe podedes acceder a máis información, do que somos e facemos no Milladoiro, premendo nos textos sinalizados coa icona dunha man interactiva.

Calquera dúbida, contactade mediante o teléfono ou o correo que aparece na imaxe.

Leo le... Banda Deseñada!

 

Premer na imaxe para acceder á galería de fotos

Presentamos a exposición Leo le... Banda Deseñada!, coincidindo co Día da Ilustración 2025 que se celebra cada 30 de xaneiro, data de nacemento de Castelao.

Unha exposición que, curso tras curso, é moi valorado: a ilustración como papel relevante acompañada de texto ou non, para todas as idades.

Longa vida a Banda Deseñada ou cómic, e feliz Día da Ilustración, hoxe e todos os días do ano!

FAMILIAS (in)FORMÁNDOSE: convivencia

Iniciamos o 2º trimestre coa formación impartida a familias ao redor da convivencia.

O vindeiro luns 20 de xaneiro, na nosa biblio, esperamos contar coas familias, que teñan dispoñibilidade, para seguir formándonos en comunidade da man de Tamara Rodríguez e dentro do Plan de Formación 2024-25

Unha oportunidade de formarción impartida por unha profesional que nos axudará a medrar persoal e socialmente.