Visita de Xurxo Alfeirán: Malpica, a nosa vila

Premendo na imaxe accederedes ao álbum de fotos da visita

No día de onte, Xurxo Alfeirán Chouciño, veciño malpicán e mestre, xa xubilado, visitou a Biblio para contar ao alumnado de 4º e 6º de Primaria a historia que esconde cada unha das imaxes que amablemente nos cedeu para realizar a exposición final de fotografía en relación co PDI iniciado este curso.

Ao longo do noso Mes das Letras puidemos recrearnos con cada unha das fotografías en branco e negro, a cor, da exposición Malpica, a nosa vila. Cada quen, cada aula reinterpretou o que foi observando, puido ler a historia malpicá narrada en imaxes.

Un privilexio que Xurxo nos relatase, coa pedagoxía que o caracteriza, quen fixo a primeira rampla do porto, o destino do edificio donado por Anselmo Villar Amigo como praza de abastos e que finalmente foi escola e ata Concello ou quenes eran os bañeiros, como daban os baños as mulleres na praia de Malpica.

Que necesario que @s nen@s coñezan o pasado, a historia da súa vila para medrar con raíces.

Agradecid@s a Xurxo pola súa inestimable colaboración e contribución, que non será a última pois achegounos ao colexio a súa exposición O ollo máxico para que tod@s experimentemos co sentido da vista.